கேதார (கௌரி) விரதத்தின் முக்கியத்துவம் — தீபாவளி

கேதார கௌரி விரதம், பொதுவாக “தீபாவளி” என அழைக்கப்படுகிறது. இது மிகுந்த பக்தி, உற்சாகத்துடன் அனுசரிக்கப்படுகிறது. சாதி, மதம், செல்வம், வறுமை போன்ற வேறுபாடுகளைத் தாண்டி மக்கள் இவ்விரதத்தை கடைப்பிடிக்கின்றனர். உண்மையில், இது ஒரு முக்கியமான ஶைவ விரதமாகும்.

ப்ருங்கி முனிவர், பரம சிவபக்தர் ஆவார். அவர் சிவபெருமானையே மட்டுமே வழிபட்டு, சக்தி தேவியைப் புறக்கணித்தார். இதனால் கோபமடைந்த தேவி, அவருடைய உடலில் இருந்து உயிர்சக்தியைப் பிரித்தார். அதன் விளைவாக அவர் நிற்கவும் இயலாதவர் ஆனார். அவர் சிவபெருமானை வேண்டிக்கொண்டார். அப்போது, சிவபெருமான் அவருக்குத் தாங்குதலாக ஒரு தடி அளித்து நிற்க அருள்புரிந்தார்..

சக்தி தேவி சிவபெருமானுடன் அர்த்தநாரீஸ்வர வடிவில் ஒன்றாகும் விருப்பத்துடன், கேதார விரதத்தை மேற்கொண்டார். இது சிவபெருமானுக்கு மிகவும் பிரியமான விரதமாகும். அவருடைய தவத்தால் மகிழ்ந்த சிவபெருமான் தமது உடலின் இடது பகுதியை தேவிக்கு அளித்து அர்த்தநாரீஸ்வரராக வெளிப்பட்டார்.

கௌரி தேவியால் மேற்கொள்ளப்பட்ட விரதம் என்பதால் இவ்விரதம் “கேதார கௌரி விரதம்” என்று அழைக்கப்படுகிறது.

விரதத்தின் காலம்

இக் கேதார விரதம், புரட்டாசி மாதத்தின் சுக்லபக்ஷ அஷ்டமியில் தொடங்கி, 21 நாட்கள் தொடர்கிறது.
இவ்விரதம் தீபாவளி — அமாவாசை நாளில் மிகுந்த பக்தியுடனும் சுத்தியுடனும் நிறைவு செய்யப்படுகிறது.

விரத விதி (அனுஷ்டான முறை)

கேதாரேஸ்வர ஸ்வாமியை நீர் நிரம்பிய கலசத்தில் பிரதிஷ்டை செய்யவேண்டும்.

அந்தக் கலசத்தின் மேல் மண்டபம் அமைக்கப்படுகிறது.

21 முடிச்சுகள் கொண்ட 21 நூல்களால் “விரத சூத்திரம்” தயாரிக்கப்படுகிறது.

பதினாறு உபசாரங்களுடன் 21 நாட்கள் தினமும் பூஜை செய்யவேண்டும் — புரட்டாசி சுக்லபக்ஷ அஷ்டமி முதல் ஐப்பசி அமாவாசை (தீபாவளி) வரை.

இறுதி நாளில், சுத்தமான மற்றும் அலங்கரிக்கப்பட்ட இடத்தில், அரிசி பரப்பி அதன்மேல் வாழை இலை போட்டு கலசத்தை மீண்டும் பிரதிஷ்டை செய்யவேண்டும்.

பலவிதமான நைவேத்யங்கள், பழங்கள் முதலியன சிவபெருமானுக்கு சமர்ப்பித்து, பக்தியுடன் தானம் வழங்கவேண்டும்.

• கேதார விரத பூஜா  முறை 

கேதார விரத மகிமை

“முனிவர்களே! இப்போது சர்வ கல்யாணங்களுக்கும் காரணமான கேதார விரதத்தின் மகிமைகளைப் பற்றி உங்களுக்குச் சொல்லுகிறேன்.

இந்தக் கேதார விரதமானது, புரட்டாசி மாதத்தில் சுக்கிலபக்ஷ அஷ்டமியில் ஆரம்பித்து, இருபத்தியோரு நாட்கள் முடியும் வரையிலும் முறைப்படி அனுஷ்டிக வேண்டிய விரதமாகும். இந்த விரதத்தின் முடிவு தினத்திலும், முறைப்படி அனுஷ்டித்து நியமத்துடன் உணவு உட்கொள்ள வேண்டும். எவனொருவன் சகல மனோ விருப்பங்களையும் அடையக்கூடிய இந்த விரதத்தை அனுஷ்டிக்கிறானோ, அவன் இந்த உலகத்தில் சகலவிதமான போகங்களையு அனுபவித்துவிட்டு, முடிவில் மோக்ஷத்தையும் அடைவான்.

முன்பொரு சமயம் ஸ்ரீகௌரிதேவி இந்த விரதத்தை அனுஷ்டித்து, அதன் மகிமையால் சிவபெருமானின் பாதி உடலைப்பெற்று மகிழ்ந்தாள். திருமாலும் அவ்வாறே வைகுண்டத்திற்கு அதிபதியாக விளங்கினார். பிரும்மதேவனும் அதன் பயனாகவே அன்னத்தை வாகனமாக அடைந்தார். அஷ்டதிக்குப் பாலகர்களும் இந்த விரதத்தை அனுஷ்டித்து அந்த வினாடியிலேயே பிரும்ம தேவனுடைய சாபத்திலிருந்தும் விடுதலை பெற்றார்கள். இதேபோன்று முன்பொரு பாக்கியவதி, புண்ணியவதி என்னும் பெண்மணிகள் இருவர், இந்த விரதத்தை அனுஷ்டித்ததின் பயனாக அளவற்ற ஐஸ்வரியங்களை அடைந்து மகிழ்ந்தார்கள். நற்குணம் வாய்ந்த பிராமணச் சிரேஷ்டர் ஒருவர் உமாபதியின் பிரியத்திற்குப் பாத்திரமான இந்த விரதத்தை அனுஷ்டித்து ஒப்பற்றவர்களான நூறு புத்திரர்களைப் பெற்றெடுத்தார். அப்பிள்ளைகளையும் இந்த விரதத்தை அனுஷ்டிக்கச் செய்த அவர், நீண்ட காலம் அவர்களோடு சேர்ந்து பலவிதமான போகங்களையும் அனுபவித்துவிட்டு, முடிவில் சிவலோகத்தை அடைந்து, மோக்ஷத்தையும் பெற்றார். இதுபோலவே கௌரிநாதருக்கு பிரீத்தியளிக்கக் கூடிய இந்த விரதத்தை அனுஷ்டித்து மோக்ஷமடைந்தவர்கள் அநேகர் இருக்கிறார்கள். ஆகையால் இந்தச் சிறப்பு வாய்ந்த அத்தியாயத்தை எவர்கள் படிக்கிறார்களோ, அல்லது கேட்கிறார்களோ அவர்கள் இந்த உலகில் பல போக பாக்கியங்களையும் அனுபவித்துவிட்டு முடிவில் ஈடு இணையற்ற மோக்ஷத்தையும் அடைவார்கள்”. இவ்வாறு தவ சீலரான சூதமாமுனிவர் சௌனகாதி முனிவர்களுக்கு கூறினார்.

- ஸ்ரீகந்த புராணம்; உபதேச காண்டம்.

See Also:
1. Purana of Shivaratri vrata
2. Shivaratri vrata puja - in Tamil; in Roman script
3. Somavara vrada puja - in Tamil
4. Umamaheswara vrada puja - in Tamil
5. Pradhosha vrata puja - in Tamil script
6. Shivaratri dates for this year