हालास्य स्तुति 

कल्याणाचल -कोदण्ड-कान्तदो-र्दण्डमण्डितम्। 
कलम्बीकृतकंसारिं कलयेऽट्टालसुन्दरम्॥ १ ॥

कालकूटप्रभा-जाल-कलङ्कीकृत-कन्धरम्। 
कलाधर-कलामौलिं कलयेऽट्टालसुन्दरम्॥ २ ॥

कालकालं कलातीतं कलावन्तञ्च निष्कलम्। 
कमलापतिसंस्तुत्यं कलयेऽट्टालसुन्दरम्॥ ३ ॥

कान्तार्धकमनीयाङ्गं करुणामृतसागरम्। 
कलि-कल्मष-दोषघ्नं कलयेऽट्टालसुन्दरम्॥ ४ ॥

कदम्बकाननाधीशं काङ्क्षितार्थ-सुरद्रुमम्। 
कामशासनमीशानं कलयेऽट्टालसुन्दरम्॥ ५ ॥

सृष्टानि मायया तेन ब्रह्माण्डानि बहूनि च। 
रक्षितानि हृतान्यन्ते कलयेऽट्टालसुन्दरम्॥ ६ ॥

स्वभक्तजन-सन्ताप-पापापद्भङ्ग-तत्परम्। 
कारणं सर्वजगतां कलयेऽट्टालसुन्दरम्॥ ७ ॥

कुलशेखरवंशोत्थ-भूपानां कुलदैवतम्। 
परिपूर्णचिदानन्दं कलयेऽट्टालसुन्दरम्॥ ८ ॥

अट्टालवीरक-श्रीशम्भोरष्टकं परमिष्टदम्। 
पठतां शृण्वतां सद्यः तनोति परमां श्रियम्॥ ९ ॥