tridal̤aṃ triguṇākāraṃ trinetraṃ ca trayāyudham .
trijanmapāpasaṃhāramekabilvaṃ śivārpaṇam ..1..
triśākhairbilvapatraiśca hyacchidraiḥ komal̤aiḥ śubhaiḥ .
śivapūjāṃ kariṣyāmi hyekabilvam śivārpaṇam ..2..
akhaṇḍabilvapatreṇa pūjite nandikeśvare .
śudhyanti sarvapāpebhyo hyekabilvam śivārpaṇam ..3..
śāligrāmaśilāmekāṃ viprāṇāṃ jātu arpayet .
somayajñamahāpuṇyam hyekabilvam śivārpaṇam ..4..
dantikoṭisahasrāṇi aśvamedhaśatāni ca .
koṭikanyāmahādānam hyekabilvam śivārpaṇam ..5..
lakṣmyāḥstanata utpannaṃ mahādevasya ca priyam .
bilvavṛkṣaṃ prayacchāmi hyekabilvam śivārpaṇam ..6..
darśanaṃ bilvavṛkṣasya sparśanaṃ pāpanāśanam .
aghorapāpasaṃhāram hyekabilvam śivārpaṇam ..7..
mūlato brahmarūpāya madhyato viṣṇurūpiṇe .
agrataḥ śivarūpāya hyekabilvam śivārpaṇam ..8..
bilvāṣṭakamidaṃ puṇyaṃ yaḥ paṭhecchivasannidhau .
sarvapāpavinirmuktaḥ śivalokamavāpnuyāt ..9..
iti bilvāṣṭakaṃ saṃpūrṇam ..