unmatta panchashat of Appayya Deekshitar Please send your corrections shrImadappayya dIkShita virachitA AtmArpaNastutiH kaste boddhuM prabhavati paraM devadeva prabhAvaM yasmAditthaM vividharachanA sRuShTireShA babhUva | bhaktigrAhyastvamiha tadapi tvAmahaM bhaktimAtrAt stotuM vA~jChAmyatimahadidaM sAhasaM me sahasva || 1 || kShityAdinAmavayavavatAM nishchitaM janma tAvat tannAstyeva kvachana kalitaM kartradhiShThAnahInam | nAdhiShThAtuM prabhavati jaDo nApyanIshashcha bhAvaH tasmAdAdyastvamasi jagatAM nAtha jAne vidhAtA || 2 || indraM mitraM varuNamanilaM padmajaM viShNumIshaM prAhuste te paramashiva te mAyayA mohitAstvAm | etaiH sArdhaM sakalamapi yachChaktileshe samAptaM sa tvaM devaH shrutiShu viditaH shambhurityAdidevaH || 3 || AnandAbdheH kimapi cha ghanIbhAvamAsthAya rUpaM shaktyA sArdhaM paramamumayA shAshvataM bhogamichChan | adhvAtIte shuchidivasakRutkoTidIpre kapardin Adye sthAne viharasi sadA sevyamAno gaNeshaiH || 4 || tvaM vedAntairvividhamahimA gIyase vishvanetaH tvaM viprAdyairvarada nikhilairijyase karmabhiH svaiH | tvaM dRuShTAnushravikaviShayAnandamAtrAvitRuShNaiH antargranthipravilayakRute chintyase yogibRundaiH || 5 || dhyAyantastvAM katichana bhavaM dustaraM nistaranti tvatpAdAbjaM vidhivaditare nityamArAdhayantaH | anye varNAshramavidhiratAH pAlayantastvadAj~jAM sarvam hitvA bhavajalanidhAveSha majjAmi ghore || 6 || utpadyApi smarahara mahatyuttamAnAM kule&smin AsvAdya tvanmahimajaladherapyahaM shIkarANUn | tvatpAdArchAvimukhahRudayashchApalAdindriyANAM vyagrastuchCheShvahaha jananaM vyarthayAmyeSha pApaH || 7 || arkadroNaprabhRutikusumairarchanaM te vidheyaM prApyaM tena smarahara phalaM mokShasAmrAjyalakShmIH | etajjAnannapi shiva shiva vyarthayankAlamAtman AtmadrohI karaNavivasho bhUyasAdhaH patAmi || 8 || kiM vA kurve viShamaviShayasvairiNA vairiNAhaM baddhaH svAmin vapuShi hRudayagranthinA sArdhamasmin | ukShNA darpajvarabharajuShA sAkamekatra baddhaH shrAmyanvatsaH smarahara yuge dhAvatA kiM karotu || 9 || nAhaM roddhuM karaNanichayaM durnayaM pArayAmi smAraM smAraM janipatharujaM nAtha sIdAmi bhItyA | kiM vA kurve kimuchitamiha kvAdya gachChAmi hanta tvatpAdAbjaprapadanamRute naiva pashyAmyupAyam || 10 || ulla~gghyAj~jAmuDupatikalAchUDa te vishvavandya tyaktAchAraH pashuvadadhunA muktalajjashcharAmi | evaM nAnAvidhabhavatatiprAptadIrghAparAdhaH kleshAmbhodhiM kathamahamRute tvatprasadAttareyam || 11 || kShAmyasyeva tvamiha karuNAsAgaraH kRutsnamAgaH saMsArotthaM girisha sabhayaprArthanAdainyamAtrAt | yadyapyevaM pratikalamahaM vyaktamAgaHsahasraM kurvan mUrkhaH kathamiva tathA nistrapaH prArthayeyam || 12 || sarvaM kSheptuM prabhavati janaH saMsRutiprAptamAgaH chetaH shvAsaprashamasamaye tvatpAdAbje nidhAya | tasminkAle yadi mama mano nAtha doShatrayArtaM praj~jAhInaM purahara bhavet tatkathaM me ghaTeta || 13 || prANotkrAntivyatikaradalatsandhibandhe sharIre premAveshaprasaradamitAkrandite bandhuvarge | antaH praj~jAmapi shiva bhajannantarAyairanantaiH Aviddho&haM tvayi kathamimAmarpayiShyAmi buddhim || 14 || adyaiva tvatpadanalinayorarpayAmyantarAtman AtmAnaM me saha parikarairadrikanyAdhinAtha | nAhaM boddhuM shiva tava padaM nakriyA yogacharyAH kartuM shaknomyanitaragatiH kevalaM tvAM prapadye || 15 || yaH sraShTAraM nikhilajagatAM nirmame pUrvamIshaH tasmai vedAnadita sakalAnyashcha sAkaM purANaiH | taM tvAmAdyaM gurumahamasAvAtmabuddhiprakAshaM saMsArArtaH sharaNamadhunA pArvatIshaM prapadye || 16 || brahmAdIn yaH smarahara pashUnmohapAshena baddhvA sarvAnekashchidachidadhikaH kArayitvA&&tmakRutyam | yashchaiteShu svapadasharaNAnvidyayA mochayitvA sAndrAnandaM gamayati paraM dhAma taM tvAm prapadye || 17 || bhaktAgryANAM kathamapi parairyo&chikitsyAmamartyaiH saMsArAkhyAM shamayati rujaM svAtmabodhauShadhena | taM sarvAdhIshvara bhavamahAdIrghatIvrAmayena kliShTo&haM tvAM varada sharaNaM yAmi saMsAravaidyam || 18 || dhyAto yatnAdvijitakaraNairyogibhiryo vimuktyai (vimRugyaH) tebhyaH prANotkramaNasamaye saMnidhAyAtmanaiva | tadvyAchaShTe bhavabhayaharaM tArakaM brahma devaH taM seve&haM girisha satataM brahmavidyAguruM tvAm || 19 || dAso&smIti tvayI shiva mayA nityasiddhaM nivedyaM jAnAsyetat tvamapi yadahaM nirgatiH saMbhramAmi | nAstyevAnyanmama kimapi te nAtha vij~jApanIyaM kAruNyAnme sharaNavaraNaM dInavRuttergRuhANa || 20 || brahmopendraprabhRutibhirapi svepsitaprArthanAya svAminnagre chiramavasarastoShayadbhiH pratIkShyaH | drAgeva tvAM yadiha sharaNaM prArthaye kITakalpaH tadvishvAdhIshvara tava kRupAmeva vishvasya dIne || 21 || karmaj~jAnaprachayamakhilaM duShkaraM nAtha pashyan pApAsaktaM hRudayamapi chApArayansanniroddhum | saMsArAkhye purahara mahatyandhakUpe viShIdan hastAlamba prapatanamidaM prApyate nirbhayosmi || 22 || tvAmevaikaM hatajanipathe pAnthamasminprapa~jche matvA janmaprachayajaladheH bibhyataH pArashUnyAt | yatte dhanyAH suravara mukhaM dakShiNaM saMshrayanti kliShTam ghore chiramiha bhave tena mAM pAhi nityam || 23 || eko&si tvaM shiva janimatAmIshvaro bandhamuktyoH kleshA~ggArAvaliShu luThataH kA gatistvAM vinA me | tasmAdasminniha pashupate ghorajanmapravAhe khinnaM dainyAkaramatibhayaM mAm bhajasva prapannam || 24 || yo devAnAM prathamamashubhadrAvako bhaktibhAjAM pUrvaM vishvAdhika shatadhRutiM jAyamAnaM maharShiH | dRuShTyApashyatsakalajagatIsRuShTisAmarthyadAtryA sa tvaM granthipravilayakRuthe vidyayA yojayAsmAn || 25 || yadyAkAshaM shubhada manujAshcharmavadveShTayeyuH duHkhasyAntaM tadapi puruShastvAmavij~jAya naiti | vij~jAnaM ca tvayi shiva Rute tvatprasAdAnna labhyaM tadduHkhArtaH kamiha sharaNaM yAmi devaM tvadanyam || 26 || kiM gUDhArthairakRutakavachogumbhanaiH kiM purANaiH tantrAdyairvA puruShamatibhirdurnirUpyaikamatyaiH | kiM vA shAstrairaphalakalahollAsamAtrapradhAnaiH vidyA vidyeshvara kRutadhiyAM kevalaM tvatprasAdAt || 27 || pApiShTo&haM viShyachapalaH santatadrohashAlI kArpaNyaikasthiranivasatiH puNyagandhAnabhij~jaH | yadyapyevaM tadapi sharaNaM tvatpadAbjaM prapannaM nainaM dInaM smarahara tavopekShituM nAtha yuktam || 28 || AlochyaivaM yadi mayi bhavAn nAtha doShAnanantAn asmatpAdAshrayaNapadavIM nArhatIti kShipenmAm | adyaivemaM sharaNavirahAdviddhi bhItyaiva naShTaM grAmo gRuhNAtyahitatanayaM kiM nu mAtrA nirastam || 29 || kShantavyaM vA nikhilamapi me bhUtabhAvi vyalIkaM durvyApArapravaNamathavA shikShaNIyaM mano me | na tvevArttyA niratishayayA tvatpadAbjaM prapannaM tvadvinyastAkhilabharamamuM yuktamIsha prahAtum || 30 || sarvaj~jastvaM niravadhikRupAsAgaraH pUrNashaktiH kasmAdenaM na gaNayasi mAmApadabdhau nimagnam | ekaM pApAtmakamapi rujA sarvato&tyantadInaM jantuM yadyuddharasi shiva kastAvatAtiprasa~ggaH || 31 || atyantArtivyathitamagatiM deva mAmuddhareti kShuNNo mArgastva shiva purA kena vA&nAthanAtha | kAmAlambe bata tadadhikAM prArthanArItimanyAM trAyasvainaM sapadi kRupayA vastutattvaM vichintya || 32 || etAvantaM bhramaNanichayaM prApito&yaM varAkaH shrAntaH svAminnagatiradhunA mochanIyastvayAham | kRutyAkRutyavyapagatamatirdInashAkhAmRugo&yaM saMtADyainaM dashanavivRutiM pashyataste phalaM kim || 33 | mAtA tAtaH suta iti samAbadhya mAM mohapAshai- rApAtyaivaM bhavajalanidhau hA kimIsha tvayAptam | etAvantaM samayamiyatImArtimApAdite&smin kalyANi te kimiti na kRupA kApi me bhAgyarekhA || 34 || bhu~gkShe guptaM bata sukhanidhiM tAta sAdhAraNaM tvaM bhikShAvRuttiM paramabhinayanmAyayA mAM vibhajya | maryAdAyAH sakalajagatAM nAyakaH sthApakastvaM yuktaM kiM tadvada vibhajanaM yojayasvAtmanaa mAm || 35 || na tvA janmapralayajaladheruddharAmIti ceddhIH AstAM tanme bhavatu ca janiryatra kutrApi jAtau | tvadbhaktAnAmanitarasukhaiH pAdadhUlIkishoraiH ArabdhaM me bhavatu bhagavan bhAvi sarvaM sharIram || 36 || kITA nAgAstarava iti vA kiM na santi sthaleShu tvatpAdAmbhoruhaparimalodvAhimandAnileShu | teShvekaM vA sRuja punarimaM nAtha dInArttihArin AtoShAnmAM mRuDa bhavamahA~ggaranadyAM luThantam || 37 || kAle kaNThasphuradasukalAleshasattAvaloka- vyAgrodagravyasanisakalasniggharuddhopakaNThe | antastodairavadhirahitAmArtimApadyamAno- &pya~gighradvandve tava nivishatAmantarAtman mamAtmA || 38 || antarbAShpAkulitanayanAnantara~ggAnapashyan agre ghoShaM ruditabahulaM kAtarANAmashRuNvan | atyutkrAntishramamagaNayan antakAle kapardin a~gghridvandve tavanivishatAmantarAtman mamAtmA || 39 || chArusmerAnanasarasijaM chandrarekhAvataMsaM phullanmallIkusumakalikAdAmasaubhAgyachoram | antaHpashyAmyachalasutayA ratnapIThe niShaNNaM lokAtItaM satatashivadaM rUpamaprAkRutaM te || 40 || svapne vApi svarasavikasaddivyapa~gkeruhAbhaM pashyeyaM kiM tava pashupate pAdayugmaM kadAcit | kvAhaM pApaH kva tava charaNAlokabhAgyaM tathApi pratyAshAM me ghaTayati punarvishrutA te&nukampA || 41 || bhikShAvRuttiM cara pitRuvane bhUtasa~gghairbhramedaM vij~jAtaM te charitamakhilaM vipralipsoH kapAlin | AvaikuNThadruhiNamakhilaprANinAmIshvarastvaM nAtha svapne&pyahamiha na te pAdapadmaM tyajAmi || 42 || AlepanaM bhasitamAvasathaH shmashAnaM asthIni te satatamAbharaNAni santu | nihnotumIsha sakalashrutipArasiddhaM aishvaryamambujabhavo&pi cha na kShamaste || 43 || vividhamapi guNaughaM vedayantyarthavAdAH parimitavibhavAnAM pAmarANAM surANAm | tanuhimakaramaule tAvatA tvatparatve kati kati jagadIshAH kalpitA no bhaveyuH || 44 || vihara pitRuvane vA vishvapAre pure vA rajatagiritaTe vA ratnasAnusthale vA | disha bhavadupakaNThaM dehi me bhRutyabhAvaM paramashiva tava shrIpAdukAvAhakAnAm || 45 || balamabalamamIShAM balbajAnAM vichintyaM kathamapi shiva kAlakShepamAtrapradhAnaiH | nikhilamapi rahasyaM nAtha niShkRuShya sAkShAt sarasijabhavamukhyaiH sAdhitaM naH pramANam || 46 || na kiMchinmene&taH samabhilaShaNIyaM tribhuvane sukhaM vA duHkhaM vA mama bhavatu yadbhAvi bhagavan | samunmIlatpAthoruhakuharasaubhAgyamuShite padadvandve chetaH parichayamupeyAnmama sadA || 47 || udarabharaNamAtraM sAdhyamuddishya nIche- ShvasakRudupanibaddhAmAhitochChiShTabhAvAm | ahamiha nutibha~ggImarpayitvopahAraM tava charaNasaroje tAtajAto&parAdhI || 48 || sarvaM sadAshiva sahasva mamAparAdhaM magnaM samuddhara mahatyamumApadabdhau | sarvAtmanA tava padAmbujameva dInaH svAminnananyasharaNaH sharaNaM prapadye || 49 || AtmArpaNastutiriyaM bhagavannibaddhA yadyapyananyamanasA na mayA tathApi | vAchApi kevalamayaM sharaNaM vRuNIte dIno varAka iti rakSha kRupAnidhe mAm || 50 || iti shrImadappayya dIkShitendraaNAM kRutishvanyatamA AtmArpaNastutiH sampUrNA |