Ravanakrutam Shivatandava Stotram

রাবণকৃতং শিবতাণ্ডব স্তোত্রম্ ।

জটাটবী গলজ্জল প্রবাহপাবিত স্থলে
গলে বলম্ব্য লম্বিতাং ভুজঙ্গ তুঙ্গ মালিকাং ।
ডমড্ডমড্ডমড্ডমন্নিনাদবড্ ডমর্বয়ং
চকার চণ্টতাণ্ডবং তনোতু ন: শিব: শিবং ॥১॥

জটাকটাহ সম্ভ্রম ভ্রমন্নিলিম্প নির্ঝরী
বিলোলবীচি বল্লরী বিরাজমানমূর্দ্ধনি ।
ধগদ্ধগদ্ ধগজ্জ্বল ললাট পট্ট পাবকে
কিশোর চন্দ্রশেখরে রতিঃ প্রতিক্ষণং মম ॥২॥

ধরাধরেন্দ্র নন্দিনী বিলাসবন্ধু বন্ধুর
স্ফুরৎ দিগন্তসন্ততি প্রমোদমানমানসে ।
কৃপা কটাক্ষ ধোরণী নিরুদ্ধ দুর্ধরাপদি
ক্বচিৎ চিদম্বরে মনো বিনোদমেতু বস্তুনি ॥৩॥

জটাভুজঙ্গ পিঙ্গল স্ফুরৎফণামণিপ্রভা
কদম্ব কুঙ্কুম দ্রবপ্রলিপ্ত দিগ্বধূমুখে ।
মদান্ধ সিন্ধুর স্ফুরত্ত্বগুত্তরীয় মেদুরে
মনো বিনোদমদ্ভুতং বিভর্তু ভূতভর্তরি ॥৪॥

সহস্র লোচন প্রভৃত্য শেষলেখ শেখর
প্রসূন ধূলি ধোরণী বিধূসরাঙ্ঘ্রিপীঠভূঃ ।
ভুজঙ্গরাজমালয়া নিবদ্ধজাটজূটকঃ
শ্রিয়ৈ চিরায় জায়তাং চকোরবন্ধু শেখরঃ ॥৫॥

ললাটচত্বর জ্বলদ্ ধনঞ্জয়স্ফুলিঙ্গভা
নিপীতপঞ্চসায়কং নমন্নিলিম্পনায়কম্
সুধাময়ূখলেখয়া বিরাজমানশেখরং 
মহাকপালি সম্পদে শিরো জটালমস্তু নঃ ॥৬॥

করাল ভাল পট্টিকা ধগদ্ধগদ্ধগজ্জ্বল-
দ্ধনঞ্জয়াধরীকৃত প্রচণ্ড পঞ্চসায়কে ।
ধরাধরেন্দ্র নন্দিনী কুচাগ্র চিত্র পত্রক
প্রকল্পনৈক শিল্পিনি ত্রিলোচনে মতির্মম ॥৭॥

নবীনমেঘমণ্ডলী নিরুদ্ধ দুর্ধরস্ফুরৎ
কুহূনিশীথিনীতমঃ প্রবন্ধ বন্ধুকন্ধরঃ
নিলিম্পনির্ঝরী ধর-স্তনোতু কৃত্তিসিন্ধুরঃ
কলানিধানবন্ধুরঃ শ্রিয়ং জগদ্ধুরন্ধরঃ ॥৮॥

প্রফুল্লনীল পঙ্কজ প্রপঞ্চ কালিমচ্ছটা-
বিডম্বি কণ্ঠ কন্ধরা রুচিপ্রবদ্ধ কন্ধরম্ ।
স্মরচ্ছিদং পুরচ্ছিদং ভবচ্ছিদং মখচ্ছিদং
গজচ্ছিদান্ধকচ্ছিদং তমন্তকচ্ছিদং ভজে ॥৯॥

অগর্ব সর্বমঙ্গলা কলাকদম্বমঞ্জরী
রসপ্রবাহ মাধুরী বিজৃম্ভণামধুব্রতম্ ।
স্মরান্তকং পুরান্তকং ভবান্তকং মখান্তকং
গজান্তকান্ধকান্তকং তমন্তকান্তকং ভজে ॥১০॥

জয়ত্বদভ্রবিভ্রম ভ্রমদ্ভুজঙ্গমস্ফুরদ্
ধগদ্ধগাদ্বিনির্গমৎকরাল ভালহব্যবাট্ ।
ধিমিদ্ধিমিদ্ধিমিধ্বনন্মৃদঙ্গ তুঙ্গমঙ্গল
ধ্বনি ক্রম প্রবর্তিত প্রচণ্ড তাণ্ডবঃ শিবঃ ॥১১॥

দৃষদ্বিচিত্র তল্পয়োর্ভুজঙ্গ মৌক্তিকস্রজো-
র্গরিষ্ঠরত্নলোষ্ঠয়োঃ সুহৃদ্বিপক্ষ পক্ষয়োঃ ।
তৃণারবিন্দচক্ষুষোঃ প্রজামহী মহেন্দ্রয়োঃ
সমপ্রবর্তয়ন্মনঃ কদা সদাশিবং ভজে ॥ ১২॥

কদা নিলিম্প নির্ঝরী নিকুঞ্জকোটরে বসন্-
বিমুক্তদুর্মতিঃ সদা শিরঃ স্থমঞ্জলিং বহন্ ।
বিমুক্তলোললোচনা ললামভাললগ্নকঃ
শিবেতি মন্ত্রমুচ্চরন্ কদা সুখী ভবাম্যহম্ ॥ ১৩॥

ইমং হি নিত্যমেব মুক্তমুত্তমোত্তমং স্তবং
পঠন্স্মরন্ব্রুবন্নরো বিশুদ্ধিমেতি সন্ততম্ ।
হরে গুরৌ স ভক্তিমাশু যাতি নান্যথা গতিং
বিমোহনং হি দেহিনাং তু শঙ্করস্য চিন্তনম্ ॥ ১৪॥

পূজাবসানসময়ে দশবক্ত্রগীতং
যঃ শম্ভুপূজনমিদং পঠতি প্রদোষে।
তস্য স্থিরাং রথগজেন্দ্রতুরঙ্গয়ুক্তাং
লক্ষ্মীং সদৈব সুমুখীং প্রদদাতি শম্ভুঃ ॥ ১৫॥

ইতি শ্রীরাবণবিরচিতং শিবতাণ্ডবস্তোত্রং সম্পূর্ণম্ ॥