Shivapanchakshara Nakshatramala Stotram

শ্রীমদাত্মনে গুণৈকসিন্ধবে নমঃ শিবায় 
ধামলেশধূতকোকবন্ধবে নমঃ শিবায় । 
নামশেষিতানমদ্ভবান্ধবে নমঃ শিবায়
পামরেতরপ্রধানবন্ধবে নমঃ শিবায় ॥১॥

কালভীতবিপ্রবালপাল তে নমঃ শিবায় 
শূলভিন্নদুষ্টদক্ষফাল তে নমঃ শিবায় । 
মূলকারণায় কালকাল তে নমঃ শিবায় 
পালয়াধুনা দয়াল়বাল তে নমঃ শিবায় ॥ ২॥

ইষ্টবস্তুমুখ্যদানহেতবে নমঃ শিবায় 
দুষ্টদৈত্যবংশধূমকেতবে নমঃ শিবায় । 
সৃষ্টিরক্ষণায় ধর্মসেতবে নমঃ শিবায় 
অষ্টমূর্তয়ে বৃষেন্দ্রকেতবে নমঃ শিবায় ॥৩॥  

আপদদ্রিভেদটঙ্কহস্ত তে নমঃ শিবায় 
পাপহারি দিব্যসিন্ধুমস্ত তে নমঃ শিবায় । 
পাপহারিণে লসন্নমস্ততে নমঃ শিবায় 
শাপদোষখণ্ডনপ্রশস্ত তে নমঃ শিবায়॥৪॥

ব্যোমকেশ দিব্যভব্যরূপ তে নমঃ শিবায় 
হেমমেদিনীধরেন্দ্রচাপ তে নমঃ শিবায় । 
নামমাত্রদগ্ধসর্বপাপ তে নমঃ শিবায় 
কামনৈকতানহৃদ্দুরাপ তে নমঃ শিবায় ॥৫॥

ব্রহ্মমস্তকাবলীনিবদ্ধ তে নমঃ শিবায় 
জিহ্মগেন্দ্রকুণ্ডলপ্রসিদ্ধ তে নমঃ শিবায় ।
ব্রহ্মণে প্রণীতবেদপদ্ধতে নমঃ শিবায় 
জিহ্মকালদেহদত্তপদ্ধতে নমঃ শিবায় ॥৬॥

কামনাশনায় শুদ্ধকর্মণে নমঃ শিবায় 
সামগানজায়মানশর্মণে নমঃ শিবায় । 
হেমকান্তিচাকচক্যবর্মণে নমঃ শিবায় 
সামজাসুরাঙ্গলব্ধচর্মণে নমঃ শিবায় ॥৭॥

জন্মমৃত্যুঘোরদুঃখহারিণে নমঃ শিবায়  
চিন্ময়ৈকরূপদেহধারিণে নমঃ শিবায় । 
মন্মনোরথাবপূর্তিকারিণে নমঃ শিবায় 
সন্মনোগতায় কামবৈরিণে নমঃ শিবায় ॥৮॥

যক্ষরাজবন্ধবে দয়াল়বে নমঃ শিবায় 
দক্ষপাণিশোভিকাঞ্চনালবে নমঃ শিবায়। 
পক্ষিরাজবাহহৃচ্ছয়ালবে নমঃ শিবায় 
অক্ষিফালবেদপূততালবে নমঃ শিবায় ॥৯॥

দক্ষহস্তনিষ্ঠজাতবেদসে নমঃ শিবায় 
হ্যক্ষরাত্মনে নমদ্বিডৌজসে নমঃ শিবায় । 
দীক্ষিতপ্রকাশিতাত্মতেজসে নমঃ শিবায় 
উক্ষরাজবাহ তে সতাং গতে নমঃ শিবায় ॥১০॥

রাজতাচলেন্দ্রসানুবাসিনে নমঃ শিবায় 
রাজমাননিত্যমন্দহাসিনে নমঃ শিবায় । 
রাজকোরকাবতংসভাসিনে নমঃ শিবায় 
রাজরাজমিত্রতা প্রকাশিনে নমঃ শিবায় ॥১১॥

দীনমানবালিকামধেনবে নমঃ শিবায় 
সূনবাণদাহকৃৎকৃশানবে নমঃ শিবায় । 
স্বানুরাগভক্তরত্ন সানবে নমঃ শিবায় 
দানবান্ধকারচণ্ডভানবে নমঃ শিবায় ॥১২॥

সর্বমঙ্গল়াকুচাগ্রশায়িনে নমঃ শিবায় 
সর্বদেবতাগণাতিশায়িনে নমঃ শিবায় । 
পূর্বদেবনাশসম্বিধায়িনে নমঃ শিবায় 
সর্বমন্মনোজভঙ্গদায়িনে নমঃ শিবায় ॥১৩॥

স্তোকভক্তিতোঽপি ভক্তপোষিণে নমঃ শিবায় 
মাকরন্দসারবর্ষিভাষিণে নমঃ শিবায় । 
একবিল্বদানতোঽপি তোষিণে নমঃ শিবায় 
নৈকজন্মপাপজালশোষিণে নমঃ শিবায় ॥১৪॥

সর্বজীবরক্ষণৈকশীলিনে নমঃ শিবায় 
পার্বতীপ্রিয়ায় ভক্তপালিনে নমঃ শিবায় । 
দুর্বিদগ্ধদৈত্যসৈন্যদারিণে নমঃ শিবায় 
শর্বরীশধারিণে কপালিনে নমঃ শিবায় ॥১৫॥

পাহি মামুমামনোজ্ঞদেহ তে নমঃ শিবায় 
দেহি মে বরং সিতাদ্রিগেহ তে নমঃ শিবায় । 
মোহিতর্ষিকামিনীসমূহ তে নমঃ শিবায় 
স্বেহিতপ্রসন্ন কামদোহ তে নমঃ শিবায় ॥১৬॥

মঙ্গল়প্রদায় গোতুরঙ্গ তে নমঃ শিবায় 
গঙ্গয়া তরঙ্গিতোত্তমাঙ্গ তে নমঃ শিবায় । 
সঙ্গরপ্রবৃত্তবৈরিভঙ্গ তে নমঃ  শিবায় 
অঙ্গজারয়ে করেকুরঙ্গ তে নমঃ শিবায় ॥১৭॥

ঈতিতক্ষণপ্রদানহেতবে নমঃ শিবায় 
আহিতাগ্নিপালকোক্ষকেতবে নমঃ শিবায় । 
দেহকান্তিধূতরৌপ্যধাতবে নমঃ শিবায় 
গেহদুঃখপুঞ্জধূমকেতবে নমঃ শিবায় ॥১৮॥

ত্র্যক্ষ দীনসৎকৃপাকটাক্ষ তে নমঃ শিবায় 
দক্ষসপ্ততন্তুনাশদক্ষ তে নমঃ শিবায় । 
ঋক্ষরাজভানুপাবকাক্ষ তে নমঃ শিবায় 
রক্ষ মাং প্রপন্নমাত্ররক্ষ তে নমঃ শিবায় ॥১৯॥

ন্যঙ্কুপাণয়ে শিবঙ্করায় তে নমঃ শিবায় 
সঙ্কটাব্ধিতীর্ণকিঙ্করায় তে নমঃ শিবায় । 
পঙ্কভীষিতাভয়ঙ্করায় তে নমঃ শিবায় 
পঙ্কজাননায় শঙ্করায় তে নমঃ শিবায় ॥২০॥

কর্মপাশনাশ নীলকণ্ঠ তে নমঃ শিবায় 
শর্মদায় নর্যভস্মকণ্ঠ তে নমঃ শিবায় । 
নির্মমর্ষিসেবিতোপকণ্ঠ তে নমঃ শিবায় 
কুর্মহে নতীর্নমদ্বিকুণ্ঠ তে নমঃ শিবায় ॥২১॥

বিষ্টপাধিপায় নম্রবিষ্ণবে নমঃ শিবায় 
শিষ্টবিপ্রহৃদ্গুহাচরিষ্ণবে নমঃ শিবায় । 
ইষ্টবস্তুনিত্যতুষ্টজিষ্ণবে নমঃ শিবায় 
কষ্টনাশনায় লোকজিষ্ণবে নমঃ শিবায় ॥২২॥

অপ্রমেয়দিব্যসুপ্রভাব তে নমঃ শিবায় 
সৎপ্রপন্নরক্ষণস্বভাব তে নমঃ শিবায় । 
স্বপ্রকাশ নিস্তুলানুভাব তে নমঃ শিবায় 
বিপ্রডিম্ভদর্শিতার্দ্রভাব তে নমঃ শিবায় ॥২৩॥

সেবকায় মে মৃড প্রসীদ তে নমঃ শিবায় 
ভাবলভ্য তাবকপ্রসাদ তে নমঃ শিবায় । 
পাবকাক্ষ দেবপূজ্যপাদ তে নমঃ শিবায় 
তাবকাঙ্ঘ্রিভক্তদত্তমোদ তে নমঃ শিবায় ॥২৪॥

ভুক্তিমুক্তিদিব্যভোগদায়িনে নমঃ শিবায় 
শক্তিকল্পিতপ্রপঞ্চভাগিনে নমঃ শিবায় । 
ভক্তসঙ্কটাপহারয়োগিনে নমঃ শিবায় 
যুক্তসন্মনঃ সরোজয়োগিনে নমঃ শিবায় ॥২৫॥

অন্তকান্তকায় পাপহারিণে নমঃ শিবায় 
শন্তমায় দন্তিচর্মধারিণে নমঃ শিবায় । 
সন্ততাশ্রিতব্যথাবিদারিণে নমঃ শিবায় 
জন্তুজাতনিত্যসৌখ্যকারিণে নমঃ শিবায় ॥২৬॥

শূলিনে নমো নমঃ কপালিনে নমঃ শিবায় 
পালিনে বিরিঞ্চিতুণ্ডমালিনে নমঃ শিবায় । 
লীলিনে বিশেষরুণ্ডমালিনে নমঃ শিবায় 
শীলিনে নমঃ প্রপুণ্যশালিনে নমঃ শিবায় ॥২৭॥

শিবপঞ্চাক্ষরমুদ্রাং চতুষ্পদোল্লাসপদ্যমণিঘটিতাম্ । 
নক্ষত্রমালিকামিহ দধদুপকণ্ঠং নরো ভবেৎসোমঃ ॥২৮॥

ইতি শ্রীমৎপরমহংসপরিব্রাজকাচার্যস্য শ্রীগোবিন্দভগবৎপূজ্যপাদশিষ্যস্য শ্রীমচ্ছঙ্করভগবতঃ কৃতৌ শিবপঞ্চাক্ষরনক্ষত্রমালাস্তোত্রং সম্পূর্ণম্ ॥