• திருவாகிய லட்சுமி தேவி வழிபட்டதால் திருமங்கலம் எனப் பெயர்.
• இத்தல இறைவனின் அருளால் ஜைமினி முனிவர் சாமவேதத்தை 1000 சாகைகளாகப் (கிளைகளாக) பிரித்தார். எனவே இவ்விறைவனுக்கு சாமவேதீஸ்வரர் என்று பெயர் வந்தது என்பர்.
• பரசுராமர் வழிபட்ட தலம். இங்குள்ள தீர்த்தம் பரசுராம தீர்த்தம் எனவும் இத்தலம் பரசுராமேஸ்வரம் எனவும் அழைக்கப்படுகிறது.
• சண்டீஸ்வரர் வழிபட்ட தலம்.
• ரைக்வ ரிஷி பித்ரு சாபம் நீங்க இங்கு வணங்க வந்தார். ஆனால் இங்கு நதி இல்லாததால் கயா செல்ல சங்கல்பித்தார். இறைவன் உடனே அங்கேயே கயாபல்குனி என்ற நதியை உருவாக்கினார். இங்கு பித்ரு வழிபாடு செய்ய கயாவில் செய்த புண்ணியம் கிட்டும்.
• உதங்க முனிவர் வழிபட்டு அமிர்தம் பெற்ற தலம்.

ஆனாய நாயனாரின் அவதாரத் தலம்

• திருமங்கலம் - இவ்வூரை சேக்கிழார் "மேன்மழ நன்னாடாம் மங்கலமாகிய வாழ்மூதூர்" என்று பெரியபுராணத்தில் குறிப்பிடுகின்றார்.
• இப்பதியில்தான் ஆனாய நாயனார் அவதரித்து வாழ்ந்து சிவத் தொண்டு ஆற்றியுள்ளார்.
• ஆனாய நாயனாரின் திருவுருவச் சிலை இத்திருக்கோயிலில் தனிச் சந்நிதியில் உள்ளது.

அவதாரத் தலம் : திருமங்கலம். வழிபாடு : இலிங்க வழிபாடு. முத்தித் தலம் : திருமங்கலம். குருபூசை நாள் : கார்த்திகை - அஸ்தம்.

• தக்ஷிணாமூர்த்தி சின்முத்திரை இன்றி அபயகரத்துடன் விளங்குகிறார்.
• முருகப்பெருமானும் தேவசேனையம்மையும் நின்றிருக்க வள்ளியம்மை மட்டும் மயில் மேல் அமர்ந்த கோலத்தில் காட்சியளிக்கிறார்.
• இவ்வாலயத்தில் துர்க்கை மகிஷன் மீது அன்றி, சிம்ஹ வாகனத்தின் மீது காட்சி தருகிறார்.
• வெள்ளிக்கிழமைகளில் சுக்ர ஹோரையில் பாணலிங்கத்தையும், கஜலட்சுமியையும் வழிபடுவதால், செல்வம் கிட்டும்.